Rufino

Rufino sagardotegiaren sagardogintza jarduera Eusebio Izagirreren eskutik etorri zen orain dela 125 bat urte inguru. Familiaren baserriak egurrezko tolare zahar bat zuen, eta zituzten sagastiekin beraien kontsumorako sagardoa ekoizten hasi ziren. Lortzen hasi ziren emaitzak ikusita, beste urrats batzuk ematera animatu zen Eusebio familiako gaztetxoen laguntzarekin.

1911. urtean, Eusebio Izagirrek Akarregi Sagardotegia irekitzea erabaki zuen, gaur egun Rufino Sagardotegia dena. Pauso hau eman zuenean, ekoiztutako litro kopurua handitzea ere erabaki zuen sagardotegiaren inguruan dauden lursailetan sagasti asko jarriaz. Hau honela, sagardoaren salmenta hasi zen gure etxean. Lehen urteetan, bertara gerturatzen zirenei bakarrik saltzen zitzaien sagardoa, basoka normalean baina baita botiletan bere azken urteetan.

1954. urtean Eusebio Izagirrek bere seme Rufino Izagirreri utzi zion sagardotegia. Hau honela, Rufino sagardotegira aldatu zitzaion izena, eta bere eskutik etorri zen gure etxearen hazkuntza nabarmenena. Rufinok, bere kamioilari lana alde batera utzi eta sagardogile lana indar handiz hartu zuen bere lehen urteetan litro kopurua hirukoiztera lortuaz. Horrela, Gipuzkoako herrietan zehar ere sagardoa saltzen hasi zen, pausoz pauso, bere merkatua zabalduz. 1985. urtean, bere iloba zen Javier Ansorenari utzi zion sagardotegia.

Gaur egun sagardotegiaren jabe den Javier Ansorenaren eskutik etorri zen bigarren hazkuntza handia. 2005. urtean, baserriari pabiloi bat atxikitu zitzaion instalakuntzak berritzeko eta litro kantitatea handitzeko asmoz. Bertan, jantoki handiago bat, sagardoa botilaratzeko makinaria berria eta kupela berriak jarri ziren. Hala, egun ekoizten ditugun 140.000 litroko ekoizpenera iritsi gara eta Euskal Herri zein Espainiar estatuko hainbat lekutan saltzera iritsi gara.